– premjera –

Anouk, něhdźe 12lětna holca, bydli w zanjesenym hnězdźe a wostudu pase. Něšto wotměny by jej woprawdźe tyło. Derje tuž, zo je w susodstwje nowa swójba zaćahnyła. Z holcu móhła sej snano hrajkać? Ta pak zda so tróšku wonajka być, so dźiwnje drasći a rěka Kimba! Wyše toho je hotowa plapotawa, jej spochi na šiju łazy a čuwy rubi. A štož je wosebje spodźiwne: w swojej stwě nima žanych mebli, jenož wulku kistu při sćěnje. Jako Anouk tež hišće zwěsći, zo Kimba žadyn wobraz w špihelu nima a kobołk zacpěwa, jej zaswita: Kimba je wampir! Tola wona njeje normalny wampir! Chce hinaša być, tak kaž čłowjekojo! Tohodla tež čłowječu krej wotpokaza a spyta Anouk jako přećelku zdobyć. Hakle wěrne přećelstwo čłowjeka by ju z wampiriskeho byća wuswobodźiło! Kimba ma krutu wolu, swój són zwoprawdźić. K tomu pak njeje jenož trjeba, zo Anouk swoje předsudki jej napřećo přewinje, Kimba dyrbi so tež njewustawacym nadběham swojich njelubych krejlačnych kuzenkow, wampirow stareje šule, dowobróć.

Hraja šulerki a šulerjo Serbskeje zakładneje šule “Jurij Chěžka” Chrósćicy, Serbskeje zakładneje šule Ralbicy a Serbskeho gymnazija Budyšin.