Dołhož fenki běža, wjerći so tež žiwjenje bjezstarostnje. Tola što činiš, hdyž je dźěło fuk a pjenjezy su trjeba? Staraš so wo to, zo pjenježne žórło njewusaknje. Eric Swan, na sebi dobra duša, njezamóže so swojej žonje Lindźe wuspowědać, zo žno dawno wjace žane dźěło nima. Město toho pak je cyle lukratiwnje za tym přišoł, kak móhł dochody naruna. Syć socialnych podpěrow je wulka, hdyž maš podružnika w domje, za kotrehož próstwu stajiš. Wšojedne hač je tón do Kanady wupućował abo tola ćežko chory we łožu leži. Eric je w tutym nastupanju liška a pomocliwosć socialneho stata bjezkónčna, hdyž dźe wo inwalidowu rentu, chorobne a dźěćace pjenjezy, podpěru za bydlenje abo šulske mloko. Mjeztym, zo jeho žona Linda z toho wuchadźa, zo chodźi Eric wšědnje pěknje na dźěło, stara so wón běžnje wo fenki. Doniž njesteji rjaneho dnja njejapcy pruwowar socialneho hamta před durjemi.
Michael Cooney je napisał kołwrótnu komediju połnu šmjatańcow, zaměnjenjow a žortnych překwapjenkow. Dokelž njemóžachmy hru w minjenej hrajnej dobje po premjerje wupada chorosćow a koronoweje pandemije dla předstajić, smy ju znowa do hrajneho plana wzali – k wašemu wjeselu, hdyž so znowa žurla pjelni ze smjećom, kaž lědma hdy do toho na našim serbskim dźiwadle.