W Serbach je mało wuměłcow, kiž su tak mnohostronske kaž je to Jurij Winar (1909-1991) był. Składnostnje jeho lětušich 30tych posmjertnin wěnuje jemu Serbski ludowy ansambl literarno-hudźbny wječork. A dokelž běše wón jako hudźbnik kaž tež spisowaćel přewšo nadarjeny, zasłyšimy na wonym wječorku bjezwuwzaćnje jeho twórby. Winarjowe wobdźěłanja serbskich ludowych spěwow předstaja instrumentalisća SLA. Na polu literarneho tworjenja wozjewjowaše wón swoje wupłody zwjetša pod  pseudonymom Jurk. Jeho basnje a powědančka su šibałe, žortne, ale druhdy tež šćipate, wusměrjejo so na satiru. Wón sej ze słowami a zynkami hrajka a lochkosć a wjesołosć jeho twórbow swědča wo jeho njezlemitym młodostnym elanje. Twórby Radworčana čita młody rozhłosownik, tohorunja w Radworju rodźeny Jakub Wowčer, kiž je hižo jako braška na ptačokwasnym programje SLA abo jako lutk w Błótowskich powěsćowych nocach wustupował.

Jurij Winar je w Serbach dźensa w prěnim rjedźe jako komponist a prěni direktor nowozałoženeho Serbskeho ludoweho ansambla znaty. A tak budźe jeho spisowaćelske zawostajenstwo někotrym zawěsće z překwapjenku. Wšako njeje jeho aforizm “Štóž wjele rěči, wo tym swědči, zo sam njewěri, štož druhim nabledźi”  dźensa ničo na płaćiwosći pozhubił.

Za zastup lići corony dla prawidło 2G!

Lisćiki dóstanjeće online tu: https://ansambl.eventim-inhouse.de/webshop/webticket/eventlist abo při tiketowej kasy Serbskeho ludoweho ansambla w Budyšinje

Foto: Jakub Wowčer