Zežiwjenska lěsna zahrodka za serbsku pěstowarnju „Chróšćan Kołć“

Informaciski wječor za naslědny zahrodkowy projekt w swójskej zahrodce wutoru, 07.01.2025 wot 16.30 – 18.30 hodź.

Po fachowej konferency Serbskeho šulskeho towarstwa a Domowiny k temje „RěčMy! – dźěći wukmanić, naslědnje myslić a jednać“ staj so dwajo do wulkotneho projekta hromadu namakałoj: Projektowy team Chróšćan serbskeho kubłanišća a zapisane towarstwo Lebens(t)räume e. V. hromadźe na ležownosći pěstowarnje jědźnu lěsnu zahrodu załožitej.

Lěsna zahroda je podobna młodemu, swětłemu lěsej. W njej steja sadowcy, worješiny a jahodowe kerki. Tež pódu pokrywace rostliny, wijate rostliny a zela tam rostu.

Wona je wulkotny srědk za škit klimy.
Přetož srěba wuhlikowy dioksyd z powětra. Ale tež mikroklima je w lěsnej zahrodźe w lěću wosebje přijomna a chłódniša hač druhdźe. Rostliny w lěsnej zahrodźe při wulkim dešću pódu škitaja, tak zo so njewotpławi. Wjele družin ptačkow a insektow so w tajkej zahrodźe derje čuje. Nic naposledk je lěsna zahroda tež přijomne městno zetkanja a kubłanja. Přez dźěło w zahrodźe a z tym, zo same žněja a płody předźěłaja, dźěći zwiski w přirodže dožiwja.

Wjednica Chróšćan kubłanišća knjeni Kerstin Šołćina wšitkich zajimowanych wutrobnje přeprošuje, na 07.01.2025 projekt zeznać. Na tutym informaciskim wječoru zhoniće wšitko wo lěsnej zahrodźe a wo projektowemu wotběhej, kotrež so hodźi w kóždej zdźěłanskej a socialnej instituciji přewjesć, z hłownym pedagogiskim zaměrom balansu mjez digitalnym a přirodnym wobswětom dźěćom a młodostnym spřistupnić a zdobom znutřkownić.

Hač do lěta 2027 nastawaja pjeć přez SMEKUL spěchowanych lěsnych zahrodow w Sakskej. Lěsna zahroda pak je předewšěm z toho žiwa, zo so ludźo gratu přimaja. Tuž podpěrujće pěstowarnju rady při natwarje lěsneje zahrody! My so wjeselimy z kóždeje pilneje ruki a Wy z tym praktisku wědu nabudźeće. Přetož nawuknjeće, kak tutón wužitny biotop twariš. Poskićimy Wam hromadźe z Lebens(t) räume e. V. w běhu cyłkowneje projektoweje doby (2025-2027) dalše dźěłarnički a poskitki, kak lěsna zahroda nastanje a so hlada. Zdobom skići praktiska wěda šulerjam a šulerkam na šulskim terainu swójsku zahrodu wuhotować.