W rynku Lausitzer Literatur vorMittag NSLDź w Budyšinje wočakuje Was sceniske čitanje k prapremjery „Šěrcec Hanka“. Čitanje je w němskej rěči. Wot 10 hodź. poskići so snědań w foyeru.

Wjele z nas Hanku Šěrcec znaje přez nowelu Jurja Kocha „Židowka Hana“ z lěta 1963, kotruž je spisowaćel w lěće 2020 we wobdźěłanej wesiji w němskej rěči wozjewił. Hanka narodźi so jako njemandźelske dźěćo z mjenom Annemarie Kreidl. Dokelž njebě jeje mać Gertrud połnolětna, přewostaji Hancyny dźěd Carl Kreidl, překupc z Drježdźan, dźěćo Šěrcecom w Hórkach. Hakle krótko do šulskeho zachoda 1925 móžeše ju Marja Šěrcec adoptować a wukřćić dać, najebać přećiwjenje Hórčan gmejnskeje rady. Jako bu Hanka 1934 firmowana, wuzwoli sej mjeno „Esther“ ze Stareho zakonja, so wuznawajo jako katolska Serbowka ze židowskimi korjenjemi. Jako nacionalsocialisća móc přewzachu, započa so systematiske přesćěhanje a zamordowanje Židow. Tež Hana bu po rasowych zakonjach jako Židowka wobjednawana, hačrunjež bě křćena, dyrbješe so antižidowskim zakonjam a zakazam podwolić a so po nich měć. Zdobom bu jej přijimanje křesćanskich sakramentow, kaž tež wuznawanje k serbskemu narodej přez nošenje narodneje drasty, zakazane. Z napjatej stawiznu spytamy žiwjenske slědy Hany Šěrcec zrekonstruować.