Je to připad abo dyrbi to jednorje tak być, zo stej słowje tak bliskej?
Poslednjej lěće njejstej žanoho bjez slědow přešłoj. Nic jenož w šuli – hotowa šmjatańca, wšitko katastrofa, ale tež w priwatnym socialnym swěće a wobchadźe mjez sobu.
Hrajerki a hrajer Młodźinskeho dźiwadła Serbskeho gymnazija při NSLDź podachu so pod nawodom Měrka Brankačka do “dźiwadłoweje terapije” a wuspytachu so tam na polu “absurdneho dźiwadła”. Čerpaja z fragmentow hrow “Chory z wumyslenja” wot Moliera a “Mr. Pilks błudnica” wot Kena Campbella. Při tym nastanje kolaža wšelakorych scenow, eksperimentalne dźiwadło w serbskej a němskej rěči, miks činohry a klankodźiwadła. Hraja šulerki a šuler Serbskeho gymnazija Budyšin. Režiju wjedźe nawoda Serbskeho młodźinskeho dźiwadła Měrko Brankačk. Wo wuhotowanje postara so, kaž hižo w zašłych lětach tež, Sandra Viola Gellert.